過錯與錯過

過錯係'錯'！錯過係'過'！'錯'可以改, 好彩的話仲可以彌補。'過'可以追, 但通常都追唔返。人越大, 因為人生經驗多, 錯越少, 但一旦錯通常係大錯。相反, 人越大, 因為越嚟越實際, 錯過越多, 錯過親情, 愛情, 友情..., 到知嘅時候通常已經到生離死別之時, 要追? 難呀！只能追憶！

過錯通常都會真接或間接影響到其他人, 後果同責任都比較實在同明顯, 錯嘅過程中亦比較容易被發覺, 所以被挽回嘅機會亦相對大。

錯過嘅後果同責任則比較內在同唔明顯, 影響性亦圍繞自己比較多, 所以自己亦難於即時察覺, 被'錯過'者就更難察覺到自己被錯過緊或者被錯過咗, 到一個實在嘅事實發生咗, 先喺嗰刻為自己嘅'過'定義為'錯過', 能挽回嘅機會亦相對小呢！

過錯與錯過同樣會為我哋帶嚟後悔與內疚, 你犯下過錯而被罰, 或向受傷害嘅人作出補償, 你嘅後悔與內疚感會隨之减少。但錯過係'過', 無人要罰你, 係你自己罰自己, 彌補亦比較難, 不實在同被動, 所以後悔與內疚感會一直維持, 亦可能增加。

如果有一日有人走埋嚟同你講: 「我俾你累X死? 」我真係聽過好多次, 因為有啲人真係好鍾意咁講, 如果你真係覺得自己嘅過錯累咗佢, 你可能會禮貌咁回應: 「咁我依家可以做啲乜嘢?」講真一個人走得埋嚟同你講呢句說話, 其實佢主要係想你去做一啲嘢, 即使係一句簡單嘅道歉, 當然可以更複雜。

如果有一日有人走埋嚟同你講: 「我俾你錯過咗? 」我會覺得好震撼, 如果你真係覺得自己錯過咗佢, 咁你會點回應? 可能都係一句簡單嘅道歉, 但係你好清楚佢想要嘅唔係呢句道歉。

心血來潮寫呢篇網誌, 係希望時刻提醒自己, 過錯可怕, 但錯過更可怕, 過錯需提防, 錯過更需提防！