反思!

最近跟一位多年好友敘舊, 言談間佢對我講：「你咁多年都無變, 都係咁自私, 自己認為啱就去做, 從來無理人感受...」我好自然地為自己辯護, 我話我所做嘅正正就係為咗其他人嘅感受先去做, 其實呢句說話講出口之後我已經好清楚根本唔洗再去解釋, 其實我就係自私。 一切都係我認為,  從來無俾機會對方去嘗試、去選擇, 永遠覺得自己所決定就一定係最好。我呢種自私係自私中最笨嘅一種, 我唔係為自己嘅利益, 亦唔係損人不利己, 而係傷害咗對方之餘, 自己亦好難受, 但係又好一廂情願咁以為自己好偉大, 好為對方著想。用上城中熱句來形容就係「超錯！」雖然我一向好討厭講對與錯, 因為我一直覺得世界上好多嘢根本就分唔到對與錯, 特別係感情上, 但係.....

人心之喪亂

天下大亂之根源, 首在於人心之喪亂, 欲安天下, 先取人心, 而人心之初本, 在於循天道, 行仁義, 持忠孝！每日打開報紙或電視便能充份體驗人心之喪亂, 天道何在？仁義忠孝何存？試問天下社會豈能不亂！

生命

生命誕生嘅時候一切由無變有, 相信亦期望自己嘅能力能某程度令此生命有好嘅成長, 對此生命嘅將來抱有憧憬之餘亦因一切未知而擔憂, 可謂既喜又驚。生命消失嘅時候一切由有變無, 為自己無能力改變及預期此生命嘅消失感到無奈之餘, 亦為一向擁有及習慣的從此失去而感到不捨及迷惘, 可謂既悲又哀。雖知本來無一物, 但區區一個凡人既能為生而喜, 如何能不為死而哀！此刻為你嘅突然離開而感到悲傷及哀痛。

意志! 鬪志! 意志! 鬪志! 意志! 鬪志!

人生係一場持續嘅奮鬥, 有高低起跌, 如果你信命理, 打開你個命盤你會睇到高高低低, 或者有人條命生得好, 一世都咁好, 或者有人條命生得衰, 一世都衰到貼地, 但係我相信我同你都無咁好彩做到呢兩種人。人生中總有高潮, 我唔知可以有幾高, 同樣地你要準備低潮喺前面等緊你, 我都唔知可以有幾低。好自然地你彈到十幾樓咁高, 你就起碼有十幾樓嘅空間俾你跌返起點, 或者再低啲。你長期喺十八層地獄都頂得住, 我相信你有一定能耐爬到上地面, 唔得都起碼死唔去。重點根本唔係幾高同幾低, 因為根本唔係完全由你控制, 你亦都唔知高高低低幾多次先停, 你亦唔知有幾長命去經歷呢啲起伏。雖然我有好多唔知, 但係我同自己講我要知道你受得起高潮時嘅成功, 喜悅, 你就要受得起低潮時嘅失敗同傷痛。我, 經歷過高潮, 唔係好高, 三四樓咁高啫, 我今日經歷緊低潮, 未知有幾低, 我相信即使再低, 爬得返起身我起碼仲係一個人, 爬唔返起身我就係一個不折不扣嘅失敗者！！！