十九

十九年前有四個十九(濕鳩)自稱為四大天王, 終日留連喺十九樓(我哋嘅紅燈區)吹水、煲煙、玩口水(有人玩口水波), 當中當然有住金龍苑九樓、出名西面小器王嘅有錢仔狗哥、住十九樓、食糖有泡、小腿有馬但無馬頭紋身嘅金毛輝、山狗報中《不平鳴》系列及副刋《老周的身體》讀書報告嘅主筆連插圖(嗰幅山水畫)嘅長桌王子尾袋黑柴 Andy、又撥又撥又撥頭、扼錢宿營 Electric Blue嘅主腦同狗會中文學會主席加保安嘅我, 同一班冚家鏟街坊(講笑~!!!)

我哋四兄弟曾幾何時形影不離, 經歷過好多快樂時光, 記得女人街嘅超濶蘿蔔褲嗎? (好似風箏咁濶), 記得淘大頂Q波樓嗎? 記得彩虹村熒光鳩、呻吟鬧鐘、燒龜同走鬼事件嗎? 重有樂華煲臘大冬菇, 掉水袋, 玩同sir滑梯嗎? 真係數之不盡！

但係經歷又點會得快樂呢? 慢慢我哋個三角左砌右砌, 砌砌吓就砌唔番喇, 我相信我同你三個都分別行過一段路, 當然你哋亦一直陪住我成長, 高低起跌!

今日我可以陪住你娶老婆、接新娘, 因為你, 我同阿狗可以去番十九樓紅燈區煲煙、吹水、吐口水...你知道我嘅心情嗎? 雖然紅燈區已經唔紅, 口水亦吐唔到落十樓.....但係你哋三個, 我哋四個....我對你哋係從來無變過, 特別係你! 我明白世事係無完美, 我亦都唔可以要求其他人好似我諗咁去做, 我好相信今日你娶咗一個好好、好適合你嘅老婆, 你亦會開始人生另一頁, 但係希望你間中可以諗起你呢三個兄弟, 諗吓我哋快樂嘅經歷, 已經好夠！

今次Andy唔能夠出現確實令我感覺上略有所失, 我相信喺未來日子我四個一定可以聚番...起碼一次或著兩次或著三次.....希望唔係喺我哋其中一個出殯嗰日！I love you and miss you all~!!! (共同渡過)

Depressed

我嘅戒煙計劃喺無聲無色下已告失敗, 相信大家嘅反應都係離不開 '~~!!!' 或者 '預咗喇~!', 多謝哂~!!!

天氣開始轉冷, 喜歡陽光與海灘嘅我心情開始轉差, 身邊嘅人唔知係咪俾我影響咗, 定係玩嘢, 人人苦口苦面, 我平日見到或察覺到其他人唔開心, 會盡辦法令佢開心番, 即使係一刻或著暫時。相反, 當我唔開心嘅時候, 無人會察覺到, 無人會氹我開心, 可能無人明白我呢個怪人喇~! 音樂同酒精始終係我情緒嘅解藥, 其實一切都無變過, 只係我對人嘅要求高咗, 人老咗始終易攰啲, 體能同精神都係一樣易攰~!!!

負面嘅新聞接踵而至, 令沮喪嘅心情更沮喪, 禽獸唔止污辱咗人, 亦污辱咗呢份神聖嘅職業。又一顆子彈帶走我嘅同事, 已經無再諗係第幾個, 只能講一句可惜~!T_T

能力、權力、責任、抨擊、誘惑、壓力、人際........要知道呢條大鎖鏈喺第一日已經扣咗喺腳上!

進度報告《一》

完全無吸煙日數: 4天

異常反應: 口痕, 吊癮, 嗑眼瞓

備註: 其實呢4日都好易過, 因為本身都病到仆街, 咳到甩肺, 唔好話食煙, 食龍肉都無味, 所以無好辛苦嘅感覺, 係lunch之後見同事去食嘅時候有少少痕！同啱啱見媽又俾婆激親, 自己其實好心痛, 好想打能爆個電話, 不過忍住忍住, 安慰安慰, 自己嘢都已經攪到自己痴痴哋, 重嚟~~~~, 好想食支relax吓, 不過我揾咗啞呤代替, 狂舉三十吓!!!頂得住!

P.S. 最恐怖嘅酒局同打邊爐都未出場, 其實我無乜信心, 戒煙你一定嬴? 講咩! 啲仆街未知我戒煙好哋哋, 一知道雪茄都買番嚟請你, 世界嘅魔鬼始終係多過天使~!!! :P

擺陣

早幾日公司大執位, 擺大陣, 金錢胡盧乜都出齊, 點不知我即刻撞邪般大病, 師傅, 究竟係咪攪錯咗呀? 不過逆境求存一直係我強項, 未驚過? 橫掂病開, 第三次戒煙行動正式開始, BB話齋遲早都要戒!就試試喇~!!!

回到過去

舊日的知心好友, 何日再會, 但願共聚, 互訴往事~!!! 以前聽到呢首歌無咁大感覺, 始終人大咗就會懷愐過去, 呢四句歌詞相信步入中年嘅人有萬般感受! (順便聽吓中間嗰段吉他Solo....嘩~!!!!!! 救命!!! 正到爆炸~!!!!)

今日終於來臨

各位兄弟姐妹, 有關今年晉升結果已於今日公佈, 細佬榜上有名, 雖然我重要面對某些未解決的事情才能安心, 但我已看通透, 以平常心面對, 得失中又有另一個得失, 至少我知道自己能力曾經被認同, 已不錯吧~!我會努力再過下一關, 多謝大家一直支持及鼓勵~!

信自己

從小到大我都相信自己, 相信自己嘅能力, 相信自己嘅决定, 相信自己嘅眼光, 相信自己嘅分析, 就係唔信感覺, 感覺係無數據, 無邏輯, 無原因, 無道理, 我最怕就係呢種捉摸唔到嘅所謂感覺。人生旅途上信過人, 但換嚟好大嘅代價, 我唔可以話信錯, 但係經歷確實令我唔敢再輕易信人。慢慢慢慢我開始將唔開心、壓力、好多好多感覺唔再同人講, 唔想身邊嘅人擔心係原因之一, 我亦唔想有人對我承諾, 又話點樣點樣幫你, 之後有講無做, 需然好多嘢唔係'老馮', 但係我始終會因為有期望而感到失望, 到今日我仍然未試過對自己失望過, 可能有好多朋友唔同意或者覺得我曾經令你哋失望過, 點都好, 我真係好盡心盡力去關心同幫助我身邊每一個人, 無話可說！

每年每月每日, 我會遇到同事、朋友或者女朋友等等....回想一吓, 我嘅大部份精神、時間或金錢都係用喺呢...

路

我覺得每一個都有屬於自己嘅路, 人生嘅路, 有人條路長啲, 有人短啲, 有人荊棘滿途, 有人康莊大道, 正因為每人條路都係屬於自己, 所以我哋無得同其他人比較, 亦唔應該比, 因為鍾意比較嘅人通常都比上不比下, 最終只換嚟辛苦、羨慕！好朋友問我人生究竟有乜意義, 當時當地我真係唔識答呢條咁深嘅問題, 但係我覺得我哋能夠唔放棄, 一直行畢全程, 好似運動員或者行山者完成佢哋要完成嘅路, 完成已經係意義, 而當中有人追求名次, 有人只求參與, 有人享受過程嘅湖江山色, 因人而異! 就係人生旅途上每個人追求都唔同, 但完成已經好有意義!!! 既然路已經為你鋪定, 總會有高有低, 我相信世事唔會只走一邊極端, 無人會叻一世, 無人會衰到底, 順住條路行, 受傷難免, 迷逃難免, 但只要堅持一直行, 始終會逃出叢林, 重見光明。有時每個人都會有攰嘅時候, 但其實我哋條路根本無限時, 時限只係你自己俾自己, 壓力都係你自己俾自己, 要同身邊嘅人交代都係你自己認為需要, 可能根本無人要你交代, 所以行得攰咪抖吓囉, 路長路短長命短命無人知, 可能轉過彎就係終點, 你會因為完成而高興?定係會因為再無得行而難過? 所以我哋應該好好享受人生嘅旅途, 珍惜陪過你、你陪過行呢條路嘅每一個人, 雖然每人條路都係屬於自己同獨一無異, 但係我哋會同其他人條路交滙上, 人同人能夠遇上係緣份, 一齊行到幾耐? 步伐一致可能好啲, 有人願意陪你上刀山, 有人見異思遷, 但點都好, 每個人都為你人生加上色彩, 不論係彩色定黑白。我慶幸我爸媽一路陪住我行咗咁耐, 當然仲有你、你  、你........而我亦都願意陪你哋每一個, 因為你能夠睇到我呢段文字, 就好似執到我掉出海嘅玻璃樽, 緣吧! 路遙知馬力、日久見人心；路不同不相為謀；陌路人；各行各路.............路不拾遺, 路見不平, 路加福音, 路易斯安那..........哈哈! 乾咗塘添~!!! : )

丑

最近好多事發生, 心情不禁再一次過山車式起伏, 當中有喜有悲, 有憂有愁。

新生命

六月尾到現在, 身邊好友同表弟分別誕下五個BB, 好開心新生命嘅來臨, 愛小孩的我看到口水流, 不過流還流, 現實歸現實, 我相信總有一天, 但不是今日吧！

光榮

奧運已開幕, 開幕禮及當中很多幕令我很感動, 感動得流淚, 人越大, 經歷比以前多, 但情感往往比以前難控制, 作為中國人而感到光榮及自豪。運動員為國家出戰感到無上光榮, 辛苦訓練、種種犧牲、汗水與眼淚、成功與失敗, 一切都好熱血啊~! 作為公僕, 我也為我係其中一員而感到自豪, 辛苦訓練、種種犧牲、汗水與眼淚、成功與失敗, 但一切卻不熱血, 而是....! 但我仍然為我嘅職業及工作感到自豪!

離開

同事因壓力自殺、車禍喪生、消防員捨身救人而殉職, 都令我很心酸及難過, 究竟生命有幾脆弱? 安息吧~!!!

 

對自己、工作、身邊嘅人....嘅執著令我很辛苦, 放不低, 早前還可以寄情於工作, 狂做狂做, 但係環境變咗, 唔到你話做就做! 唔想又用酒精去減低辛苦嘅感覺, 雖然呢個係最快捷方便及短時間內即時有效嘅方法, 你會說運動吧!  六年前我已經話要做運動~~~

我唔想再同人講嘢, 淨係想同自己講嘢, 我見到你哋開心就夠, 我諗乜又有乜重要, 重要又點吖? 小丑背後原本就係好寂寞同唔開心架喇, 當我第一眼見到你我就知道、明白同感受到, 眨吓眼你就陪咗我十一、二年喇~!!!

舊結他

幾年前突然想學結他就即刻走去通利買咗支結他同M, 結果就梗係彈咗陣就放埋一邊喇, 前幾日攞返出嚟, 結他仍然好新好靚, 但係我自己就老咗仔多喇~!

生日快樂

三十一歲生日喺低調、舒適、充實及愉快嘅心情下過了, 喜歡刺激味濃的冬蔭功, 但偶然喝一碗無味精嘅清湯 :P 感覺清新呀~!!! 人大了好像一切都想平淡點, 還是動極思靜而已。肥仔嘜個蛋糕又靚又好食, 不過真係貴咗啲, 一年一次就算喇~!!! 有咁多老友記記得我生日真係開心, 契女喺廿八号出咗世又係開心事, 下半年開始會一切順利, 人人身體健康~!!!

懷念

真係好懷念以前嘅好多好多嘢, 以前嘅單純, 以前嘅友誼, 以前嘅打波生活, 以前嘅朋友, 以前嘅電影, 以前嘅音樂.......啱啱買咗Beyond 25th Anniversary, 好正~!!!喺當中令我回憶番以前好多片段, 好掛住家駒把聲同啲歌, 重記得佢死嗰日我同班中學同學喺地鐵站等, 準備同我慶祝生日, 依家重好深刻。

不過呢個世界係咁, 生生死死已經睇得好化! 華哥, 安心上路喇!

倦嗎？

最近身邊幾個老友都令我覺得, 佢哋好攰, 唔係身體上嘅攰, 係生活上、精神上嘅攰！但係呢種攰喺你超忙嘅時候係感受唔到, 相反地喺一切過後先至出現。你倦嗎？

倒數七個月

依家我停留咗喺一個好奇怪嘅狀況, 未來七個月將會改寫我嘅人生, 我無刻意去諗, 一齊亦唔輪到我去改變, 不變應萬變, 將集中力分散, 感覺想任何人都睇唔到我, 盡量低調低調, 想靜悄悄咁渡過呢段前所未有嘅恐怖時光！

今日終於來臨

各位兄弟姐妹, 有關今年晉升結果已於今日公佈, 細佬榜上有名, 雖然我重要面對某些未解決的事情才能安心, 但我已看通透, 以平常心面對, 得失中又有另一個得失, 至少我知道自己能力曾經被認同, 已不錯吧~!我會努力再過下一關, 多謝大家一直支持及鼓勵~!

我該如何?只能一直向前走吧!

三十年的人生, 差不多生命的一半吧~! 精采? 充實? 成功? 失敗? 誰來下定論? 我跟朋友說, 我但願人生可以平淡一點, 但世事又豈能由我來控制, 那只好面對人生中每一個情節吧。歡喜、悲傷、憤怒、痛苦、恐懼、迷惘.....我想無必要分得太仔細吧! 我一直抱著簡單的座右銘去待人處事, 我努力去尊重身邊每一件事每一個人, 我努力去令身邊我值得珍惜嘅人開心, 當然我亦傷害過身邊很多珍惜過我的人, 人是自私吧! 昨天我十多年的好友很認真的叫我做人自私點吧, 他不願見我受騙, 我心想假如騙我的人見我明知受騙也讓他去騙, 他還忍心再去騙我嗎? 好像有點變態吧! 但是我發現用這樣的心態處事, 原來令愛護我的人心痛, 我會好好檢討~!

今年一開始就知道是艱難的一年, 我對自己抱有自信及堅持, 深信兵來將擋, 也有幸身邊每一個你對我的支持, 我是撑得住的! 但隨著時間一日一日的過, 遇到的事件好像要將我的自信及堅持一片片地從我身上扯下來。在我對人生的比重開始改變的時候, 在我再嘗試去改變的時候, 這穿心的一箭, 將這個剛從地上爬起的我再次射倒在地上, 我該如何? 答案就如自然反應的快速浮現腦海: 再爬起來, 路還有很長要走, 可能比之還要難行, 還要孤單, 但我心想現在只能一直向前走吧!

過山車

最後收到嘅消息都係唔樂觀嘅, 雖然身邊嘅人都好心安慰話無事嘅, 唔好諗咁多喇...但係針唔拮到肉又點知痛吖, 不過我仍然好多謝佢哋一番好意。

釣魚貓

當人人都興高釆烈地為燦爛奪目嘅煙花喝采, 當朋友喺派對中載歌載舞,

我始終投入唔到, 感覺就好似呢隻釣魚貓一樣, 喺熱鬧嘅氣氛中顯得格格不入。

雖然已步入新嘅一年, 但係未解決嘅仍然未解決, 人生最討厭嘅兩種狀況 (等、唔到自己控制)

同時出現, 令我有作嘔嘅感覺！好彩身邊還有你、你、你。

大時大節

今年真係好運, 除夕喺酒吧倒數完抽獎, 我嗰枱八個人中咗四隻金飾同一支紅酒, 勁~!