七月十四日, 喺MSN中收到好友母親逝世嘅消息, 成個心離一離, 慢慢有痛嘅感覺, 但當時要做嘅喺先take care我呢位好友, 我絕對明白佢嘅傷痛, 因為我同樣感到傷痛, 我明白佢嘅難過係無人能夠感受, 我好衷心好衷心希望佢能夠渡過人生定律所帶嚟嘅傷痛, 亦希望幸福同快樂會與她常在。
Auntie, 好開心喺生命中曾經認識你, 同你相處令我感到舒服、自然, 你係一個親切、隨和同易於溝通嘅長輩, 我腦中所有有關於你嘅影象都係充滿笑容同歡笑, 相信你喺世界另一方亦同樣帶住笑容同歡笑, 永遠永遠！安息。
七月十六日, 喺醫院目送我婆婆走完人生最後一刻, 仲記得我將手輕放喺你手臂時仍然感到暖嘅感覺, 生命嘅感覺, 一轉眼, 生命就咁離開咗軀體, 望住婆婆嘅遺體, 將手再放喺你手臂, 我好清楚感覺到你走咗！仲記得上次我去探你, 你好精靈, 雖然你係瞓喺度, 雙眼閉上, 但係我知道你知係我, 「阿豪呀！」, 係我, 我買咗盤花仔俾你 (你嘰一聲笑, 我唔會忘記！), 紫色架, 唔洗淋水架, 因為係假架, 我放喺櫃上面, 你得閒望吓喇！「好！」我走喇, 遲啲再嚟探你！「好！」呢次係我最後一次同你對話。最後喺醫院, 阿媽係你耳邊話阿豪嚟睇你呀, 你好大力咁呼吸, 我知道你知我嚟咗。婆婆, 你喺我腦中嘅片段同樣喺美好、愉快嘅, 我會好好照顧我需要照顧嘅人, 你安心到主嘅懷抱喇！婆婆, 我愛你！
我好清楚其實自己係好唔開心, 但係我表達唔到, 亦表現唔到, 身體好似裝咗防毒軟件一樣隔離咗啲唔開心喺身體裡面, 理智亦命令我要堅強, 堅強咁去照顧身邊嘅人, 泠靜去決解出現嘅問題, 認真去辦婆婆嘅後事, 當一切解決後, 我希望可以洗滌一吓心靈, 我需要自己一個靜吓...靜吓...一陣風會將我內裡嘅唔開心同傷痛一併帶走~~~
