意志! 鬪志! 意志! 鬪志! 意志! 鬪志!

人生係一場持續嘅奮鬥, 有高低起跌, 如果你信命理, 打開你個命盤你會睇到高高低低, 或者有人條命生得好, 一世都咁好, 或者有人條命生得衰, 一世都衰到貼地, 但係我相信我同你都無咁好彩做到呢兩種人。人生中總有高潮, 我唔知可以有幾高, 同樣地你要準備低潮喺前面等緊你, 我都唔知可以有幾低。好自然地你彈到十幾樓咁高, 你就起碼有十幾樓嘅空間俾你跌返起點, 或者再低啲。你長期喺十八層地獄都頂得住, 我相信你有一定能耐爬到上地面, 唔得都起碼死唔去。重點根本唔係幾高同幾低, 因為根本唔係完全由你控制, 你亦都唔知高高低低幾多次先停, 你亦唔知有幾長命去經歷呢啲起伏。雖然我有好多唔知, 但係我同自己講我要知道你受得起高潮時嘅成功, 喜悅, 你就要受得起低潮時嘅失敗同傷痛。我, 經歷過高潮, 唔係好高, 三四樓咁高啫, 我今日經歷緊低潮, 未知有幾低, 我相信即使再低, 爬得返起身我起碼仲係一個人, 爬唔返起身我就係一個不折不扣嘅失敗者！！！