地球上曾經有個時候

地球上曾經有個時候, 道德、良心都存在人心, 正義、公義為正道大道。然而時移世易, 今天除了極少數極少數的例外, 大多數人, 有財勢有權勢的人都不願去思考道德良心、正義公義等問題了。時下的道德公義問題, 幾乎全都不是發自內心, 本性的, 而只是基於個人利益, 政治目的。不能怪人們對此不感興趣, 不予理睬, 不屑一顧。被社會輕視, 被功利掩蓋, 大家不感興趣, 不予理睬, 不屑一顧的道德公義已難以光復, 與其寄望神跡出現, 不如正視現實；與其呆等它光復, 不如由得它自然衰微。這並不代表就要放棄它忘記它, 只是我相信當世界到了道德淪亡、良心泯滅的時候, 正義和公義便會再次出現, 再次成為正道大道。
以前我會為不公義的事大發雷霆, 為改變不了而沮喪, 慢慢地你會明白當你決定為正義站起來的時候, 你同時要有付出代價的準備。慢慢地你又會明白你所付出的, 對你來說確實是沈重的代價, 但你所為的正義, 可能只站起了一陣子。慢慢地你又會明白伸張正義其實需要很大的能力才有效果, 但又正如我所講, 今天除了極少數極少數的例外, 大多數有財勢有權勢的人都不願去思考道德良心、正義公義等問題了, 因為在追求成為有財有權的有能之士的過程中, 放下道德和良心彷彿是一個重要元素, 始終這是一個功利的世界吧。慢慢地你又會明白你生活在這樣的世界, 當大多數人都在說功利主義的時候, 你仍能心存道德良心、正義公義地和大多數人和平相處, 而沒有為現實而放棄它忘記它, 其實已經不易。
最近, 我分別跟三個年青人聊天時剛巧討論到正義和好人這些話題, 第一個青年說：「正義呢兩個字我除咗依家喺你口中聽到之外, 我呢十幾年無聽過人講, 今日我淨係知要揾多啲錢, 咁我就會開心架喇。」第二個青年說：「我喺你身上再次証明做好人係無好報, 呢個社會係咁教我, 除咗你邊有人講正義呀仲。」第三個青年說：「你同我講作為一個以幫人為樂嘅人, 俾你幫嘅人其實幫緊你實踐人生意義？你係咪傻架？有啲變態！」
其實如果有一樣嘢喺世界上已經完全無存在價值, 我相信呢樣嘢真係會喺呢個世界上消失, 既然呢樣嘢一直都無消失, 佢一定有佢嘅存在價值, 而佢嘅價值我唔認為從多唔多人講嚟衡量。
一直以來, 做好人都唔應該希望會因此而會有好報先去做, 做好人本身就係一件快樂嘅事, 你只係做一件令自己快樂嘅事, 就係咁簡單。呢個社會教識我哋好多嘢, 我覺得變成一個乜嘢人唔係個社會咁教你, 而係你揀咗你想學嘅學啫。
地球上曾經有個時候人人都以幫人為樂, 我覺得今日可能係個世界傻咗啫, 如果世界上有一種唔傷害到其他人嘅變態, 你就當我係變態喇。