Story

我係一個拳擊手，站喺擂台上從來無感覺過恐懼，我由一個新人好快轉為職業，十四年既拳擊生涯我得獎無數，有人當我係偶像，有人好欣賞我既打法，我既STYLE！我對自己從來自信爆膨，我一直將自己包裝成一個鐵人，跌倒再站起來，跌倒再站起來。我去教人打拳，同人分享我既經驗，我既成功故事。上年年頭，我得到我人生第一條金腰帶，可以話係人生既高峰！所有支持我既人都歡喜若狂！
上年九月，我喺擂台上被對手狠狠咁打左一拳，呢拳實在太重，打得實在太應，我口中既牙膠同我既信念一同被打到吐左落地，我感到好暈眩，睇唔到前面，前面一片黑暗，我既心第一次感到恐懼，我嘗試用擂台既柱作依靠，呢次係我第一次我用擂台既柱作依靠，感覺好奇怪，亦好無安全感，雖然我可以勉強站起來，但係我知道我唔可以一直扶住條柱，決定離開柱邊嗰一刻我好驚，因為我唔知我係咪真係可以企到喺度，結果我又跌返低，我聽到擂台邊有好多人支持我，亦有人喝倒采，我見到我既支持者，我見到有人因為擔心我而喊，支持者當中，我見到我女朋友，近年嚟佢睇住我打好多場比賽，一直好支持我，但係今次係我第一次喺佢面前跌倒，我見到佢忍住眼淚同我講「無事咖！無事咖！唔駛擔心！」但係我感到好難過，我既自專心接受唔到我喺佢面前跌倒，落敗。我唔知我之後可唔可以企返起身，我唔知企返起身之後又會點，我只係知道喺呢一刻我唔想比佢見到我咁，所以我好大聲，好惡咁喝佢走。我好矛盾，一方面，我好需要佢既支持同鼓勵，另一方面，我真係接受唔到佢喺度。我見到佢好傷心咁離開左會場，我個心好痛，好痛！喺佢離開會場嗰一刻，我清楚知道我唔可以依賴任何嘢，眼前什麼都唔駛諗，一心一意去面對呢場比賽。我好明白支持我既人既心情，但係佢地始終喺擂台外，感受唔到呢拳實際有幾重，對我做成幾大既創傷，面對再被擊倒既恐懼。鐵人外殼只係包裝出嚟，背後都只不過係一個人，人受傷跌低唔係話企起身就企起身，連我自己都無幻想過會有一日企唔到起身，但事實就係咁。忽然間，我醒起我唔左舊牙膠，我知道如果我要繼續比賽，我一定要搵返我舊牙膠同我既信念，但係我發覺擂台上有好多舊牙膠，可能係我既幻覺，我見到其中一舊係我剛才吐出嚟嗰舊，我心裡面突然好懷疑呢舊牙膠究竟仲保唔保護到我，裁判已經數到第五秒，我決定將呢舊牙膠放返入口......